Thalaivasal Vijay as Sree Narayana Guru

ഇരുപതാം നൂറ്റാണ്ടില്‍ കേരളം കണ്ട ഏറ്റവും വലിയ ജീവിതങ്ങളിലൊന്നാണ് ശ്രീനാരായണഗുരുവിന്റേത്. ചാതുര്‍വര്‍ണ്യത്തിന്റെ ദുരിതങ്ങള്‍ ഒന്നായി അനുഭവിക്കേണ്ടി വന്ന ഒരു വലിയ ജനവിഭാഗത്തിന് സ്വാതന്ത്ര്യത്തിന്റെയും സ്വാശ്രയത്തിന്റെയും സ്വാഭിമാനത്തിന്റെയും സുവര്‍ണദിനങ്ങളിലേക്ക് ചുവടു വയ്ക്കാന്‍ ധൈര്യം നല്‍കിയ ഗുരുവിന്റെ ജീവിതവും കാലവും പുനരാവിഷ്‌കരിക്കാനുള്ള ശ്രമമാ‍ണ് ആര്‍. സുകുമാരന്‍ സംവിധാനം ചെയ്ത യുഗപുരുഷന്‍.
തലൈവാസല്‍ എന്ന തമിഴ് ചിത്രത്തിലൂടെ പ്രശസ്തനായ തലൈവാസല്‍ വിജയ് ആണ് ശ്രീനാരായണഗുരുവിന്റെ വേഷത്തില്‍ എത്തുന്നത്. ഗുരുവിന്റെ സമകാലികരായിരുന്ന ചട്ടമ്പി സ്വാമികള്‍, കുമാരനാശാന്‍ (സജി വാക്കനാട്), അയ്യങ്കാളി (ബാബു ആന്റണി), ഡോ. പല്‍പ്പു (സിദ്ദിഖ്), സഹോദരന്‍ അയ്യപ്പന്‍ (ജിഷ്ണു), കെ സി കുട്ടന്‍ (മമ്മൂട്ടി) ടി കെ മാധവന്‍ (ദേവന്‍), മന്നത്ത് പദ്മനാഭന്‍ തുടങ്ങിയവര്‍ മുതല്‍ ഗാന്ധിജിയും ടഗോറും വരെ ഈ ചിത്രത്തിന്റെ ഭാഗമായി വരുന്നുണ്ട്. വൈക്കം സത്യഗ്രഹം, കുമാരനാശാന്റെ ജീവനെടുത്ത റിഡീമര്‍ ബോട്ടപകടം തുടങ്ങിയ ചരിത്രസംഭവങ്ങള്‍ക്കൊപ്പം ചില ഭാവനാസൃഷ്ടികളും ഇടയ്ക്ക് ചിത്രത്തില്‍ ഇടം നേടുന്നു.

PLUSES
ശ്രീനാരായണഗുരുവിനേപ്പറ്റി ഒരു സിനിമ നിര്‍മിക്കപ്പെട്ടു എന്നതു തന്നെ വലിയ കാര്യം. അദ്ദേഹത്തിന്റെ നവീനവും ധീരവുമായ ദര്‍ശനം ഒരു കാലത്ത് കേരളീയജീവിതത്തെ സ്വാധീ‍നിച്ചതെങ്ങനെയെന്ന് വരും തലമുറയ്ക്ക് കുറച്ചെങ്കിലും മനസ്സിലാക്കി കൊടുക്കാന്‍ ഈ ചിത്രം ഉപകരിക്കും.

ചരിത്രസിനിമയുടെ കാസ്‌റ്റിങ് ഏതു സംവിധായകനെ സംബന്ധിച്ചിടത്തോളവും വെല്ലുവിളി തന്നെയാണ്. തൃപ്തികരമായി ആ കടമ്പ കടക്കാന്‍ ആര്‍ സുകുമാരനു കഴിഞ്ഞു. കുമാരനാശാനും ശ്രീനാരായണഗുരുവുമാണ് നമ്മള്‍ കണ്ടുശീലിച്ച രൂപങ്ങളോട് ഏറ്റവും അടുത്തു നില്‍ക്കുന്നത്. തലൈവാസല്‍ വിജയ് എന്ന മലയാളിയല്ലാത്ത നടന്‍ ഗുരുവിന്റെ വേഷത്തോട് ശരിക്കും നീതി പുലര്‍ത്തുകയും ചെയ്തു.

MINUSES
ഗുരുവിന്റെ ജീവിതത്തിലെ ചില മുഹൂര്‍ത്തങ്ങള്‍ ഒരു ഡോക്യുമെന്ററിയിലെന്നപോലെ ചിത്രീകരിക്കുന്നതിനപ്പുറത്ത് മികവൊത്ത ഫീച്ചര്‍ സിനിമ ഒരുക്കാനോ കാണികളെ പിടിച്ചിരുത്തുന്ന ഒരു കലാസൃഷ്ടിക്ക് രൂപം കൊടുക്കാനോ ആര്‍. സുകുമാരന് കഴിഞ്ഞിട്ടില്ല.
ചരിത്രസംഭവങ്ങള്‍ ഏറെക്കുറേ കൃത്യതയോടെ അവതരിപ്പിച്ചിട്ടുണ്ടെങ്കിലും അവ പലപ്പോഴും സിനിമയുടെ ഫോക്കസ് നഷ്ടപ്പെടുത്താനേ ഉപകരിച്ചിട്ടുള്ളു. ഭാവന കയറി വരുന്നിടത്തൊക്കെ സിനിമ പാളുകയോ നിലവാരമില്ലാതെ പോവുകയോ ചെയ്യുന്നുണ്ട്. ഉദാഹരണത്തിന്, പരമുവിന്റെ(ജഗതി ശ്രീകുമാര്‍) വീട്ടില്‍ ഗുരു വരുന്ന സീക്വന്‍സ് ജഗതിയുടെ അമിതാഭിനയം കൊണ്ടും സീനിന്റെ നിസ്സാരത കൊണ്ടും അപഹാസ്യമായി പോകുന്നു.
കാണികള്‍ക്ക് ആളെ മനസ്സിലാക്കിക്കൊടുക്കുക എന്ന ഉദ്ദേശത്തോടെയാണെങ്കിലും മന്നത്ത് പദ്‌മനാഭാ.. മൂര്‍ക്കോത്ത് കുമാരാ.. കെ സി കുട്ടാ.. എന്നൊക്കെ പൂര്‍ണനാമത്തില്‍ അതതു കഥാപാത്രങ്ങളെ വിളിക്കുന്നത് അരോചകമാണ്.
സിനിമ അവസാനിക്കാറാകുമ്പോഴേക്കും ഗുരുവടക്കം മിക്ക കഥാപാത്രങ്ങളും വൃദ്ധരോ ക്ഷീണിതരോ ആയി മാറുന്നുണ്ടെങ്കിലും കെ സി കുട്ടന്‍ ഒരു മുടി പോലും കറുക്കാതെ തീപ്പൊരിയായി നില്‍ക്കുന്നതും ഒരു ചിരിക്കു വക തരും. (മമ്മൂട്ടി അഭിനയിച്ചതുകൊണ്ട് കുട്ടനു കിട്ടിയ ലോട്ടറിയാണ് ഈ ചെറുപ്പം എന്നു തോന്നുന്നു.)
നല്ലൊരു തുടക്കവും നല്ലൊരു അവസാനവും ഇല്ല എന്നതും ഈ ചിത്രത്തിന്റെ വലിയൊരു പോരായ്മ തന്നെയാണ്.

LAST WORD
നല്ല ഉദ്ദേശ്യത്തോടെ നിര്‍മിച്ച, ഉദ്ദേശിച്ചത്ര നന്നാകാതെ പോയ ഒരു സിനിമ.

RATING
Try At Your Risk
(Scale: *Avoid *Try At Your Risk *Good *Excellent *Great)

| G Krishnamurthy